جنوبی افریقہ کی ایک عدالت نے سابق گرینڈ سلیم ٹینس سٹار باب ہیوٹ کو کم عمر لڑکیوں کا ریپ کرنے پر چھ سال قید کی سزا سنا دی۔

مارچ میں 75 سالہ ہویٹ پر 1980 اور 1990 کی دہائی میں کوچنگ کے دوران دو لڑکیوں کے ریپ اور ایک پر جنسی حملے کی کوشش کا جرم ثابت ہو گیا تھا۔

جج نے کیس کی سماعت کے دوران افسوس نہ ظاہر کرنے پر آسٹریلیا میں پیدا ہونے والے اسٹار کو سخت تنقید کا نشانہ بنایا اور کہا کہ جرم کسی بوڑھے نے ہی کیوں نہ کیا ہو لیکن انصاف ہوتا نظر آنا چاہیے۔

سزا سنائے جانے سے پہلے ہیوٹ کی بیوی نے عدالت سے رحم کی اپیل کرتے ہوئے قید کی سزا نہ دینے کی اپیل کی۔ تاہم، جج نے کہا کہ تینوں لڑکیوں کے بیان میں مماثلت ہونے سے معلوم ہوتا ہے کہ ہیوٹ نے سوچے سمجھے منصوبے کے تحت یہ فعل کیا۔

توقع ہے کہ 1960 اور 1970 کی دہائی میں گرینڈ سلیم ڈبل چیمپین رہنے والے ہیوٹ سزا کے خلاف اعلی عدالت میں اپیل کریں گے۔