طلال چوہدری کی برطانوی وزرا سے ملاقاتیں، انسانی اسمگلنگ سے نمٹنے کیلئے مشترکہ حکمت عملی پر زور
وزیر مملکت برائے داخلہ طلال چوہدری نے برطانوی وزیرداخلہ اور نائب وزیرخارجہ سے ملاقات کی ہے اور دہشتگردی اور انسانی اسمگلنگ کے چیلنجز سے نمٹنے کیلئے مشترکہ حکمت عملی پر زور دیا ہے۔
ڈان نیوز کے مطابق وزیرمملکت برائے داخلہ طلال چوہدری نے لندن میں برطانوی وزیرداخلہ یوویٹ کوپر، نائب وزیرخارجہ ہمیش فالکز اور انجیلا ایگل سے ملاقات کی ہے، ملاقات میں سرحدی سیکیورٹی تبادلہ خیال کیا گیا۔
وزیرمملکت نے برطانوی وزرا سے ملاقات میں کہا کہ پاکستان غیر قانونی امیگریشن اور منظم جرائم کے خاتمے کیلئے سرگرم ہے، انہوں نے کہا کہ دہشت گردی اور انسانی اسمگلنگ کے چیلنجز سے نمٹنے کیلئے مشترکہ حکمت عملی ناگزیرہے۔
وزیرمملکت برائے داخلہ نے برطانوی حکام سے غیر قانونی امیگریشن کے خاتمے اور قانونی راستوں کے فروغ پر گفتگو کی اور کہا کہ قانونی راستوں اور امیگریشن کے فروغ کے لیے اقدامات ضروری ہیں۔
ملاقات میں برطانوی وزرا نے غیر قانونی امیگریشن کے خاتمے کیلئے حکومت پاکستان کی کاوشوں کوسراہا اور برطانوی نائب وزیرخارجہ ہمیش فالکز نے کہا کہ وزیرداخلہ محسن نقوی سے چندماہ قبل کی ملاقات کے مثبت نتائج سامنے آرہے ہیں۔
وزیرمملکت برائے داخلہ نے جرمنی، اسپین، آسٹریا اورپولینڈ کے وزرائے داخلہ سے بھی ملاقاتیں کیں اور باہمی دل چسپی کے امور پر تبادلہ خیال کیا۔
لائیو ٹی وی