حکومت بلوچستان غیر معمولی حالات میں غیر معمولی اقدامات کے لیے تیار ہے، وزیر اعلیٰ
وزیر اعلیٰ بلوچستان نے سی ٹی ڈی، پولیس اور لیویز کو جدید آلات سے لیس کرنے کا اعلان کرتے ہوئے کہا ہے کہ حکومت غیر معمولی حالات میں غیر معمولی اقدامات کے لیے تیار ہے۔
کوئٹہ میں وزیر اعلیٰ بلوچستان سرفراز بگٹی نے سینٹرل پولیس آفس کا دورہ کیا۔ چیف سیکریٹری بلوچستان شکیل قادر خان بھی وزیر اعلیٰ کے ہمراہ تھے۔
سرفراز بگٹی کو صوبے میں امن و امان کی صورتحال پر بریفنگ دی گئی۔
شرکا سے خطاب میں وزیر اعلیٰ بلوچستان نے ہدایت کی کہ سی ٹی ڈی، پولیس، لیویز اور تمام قانون نافذ کرنے والے ادارے سیکیورٹی کا جامع پلان مرتب دیں، کسی بھی افسوسناک واقعے کی صورت میں مؤثر اور فوری ردعمل دیا جائے جبکہ شاہراہوں کی حفاظت کے لیے گشت کو بڑھایا جائے۔
انہوں نے واضح کیا کہ حکومت غیر معمولی حالات میں غیر معمولی اقدامات کے لیے تیار ہے اور بدامنی اور انتشار پھیلانے والوں کو کسی صورت معاف نہیں کیا جائے گا۔
سرفراز بگٹی نے واضح کیا کہ حکومت پوری قوت سے افسوسناک واقعات میں ملوث عناصر کو منطقی انجام تک پہنچائی گی، دہشت گردوں اور ان کے سہولت کاروں کو ہر صورت کیفرِ کردار تک پہنچایا جائے گا۔
واضح رہے کہ بلوچستان کے ضلع موسٰی خیل کے علاقے راڑہ شم کے مقام پر ٹرکوں اور مسافر بسوں سے اتارکر شناخت کے بعد 23 افراد کو فائرنگ کرکے قتل کر دیا گیا تھا۔
ڈان نیوز کے مطابق اسسٹنٹ کمشنر نجیب کاکڑ نے بتایا کہ مسلح افراد نے بین الصوبائی شاہراہ پر ناکہ لگا کر مسافروں کو بسوں سے اتارا اور شناخت کے بعد 23 افراد کو فائرنگ کرکے قتل کردیا۔
نجیب کاکڑ نے بتایا تھا کہ مسلح افراد نے 10 گاڑیوں کو بھی نذر آتش کر دیا۔
دوسری جانب بلوچستان کے ضلع بولان سے بھی 6 افراد کی لاشیں برآمد ہوئی ہیں۔
اسٹیشن ہاؤس افسر (ایس ایچ او) ڈھاڈر پیر بخش بگٹی نے بتایا تھا کہ 2 لاشیں تباہ شدہ پل کے نیچے دبی ہوئی تھیں جبکہ 4 لاشیں قومی شاہراہ میں کولپور کےمقام پر ملی ہیں۔
ایس ایچ او کے مطابق ان افراد کو فائرنگ کرکے قتل کیا گیا، اندازہ ہے مقتولین کو شناختی کارڈ چیک کرکے قتل کیا گیا ہے۔
لائیو ٹی وی