ملتان: وزیر اعظم نواز شریف نے خانیوال سے ملتان تک موٹر وے کا افتتاح کر دیا۔

خانیوال تا ملتان سیکشن، کراچی- لاہور موٹر وے کا توسیعی منصوبہ ہے، جو 55.6 کلومیٹر طویل ہے۔

موٹر وے منصوبے کے حوالے سے بریفنگ میں وزیر اعظم نواز شریف کو بتایا گیا کہ 12 ارب 90 کروڑ روپے کے خانیوال تا ملتان موٹروے منصوبے میں 90 کروڑ روپے کی بچت کی گئی۔

منصوبے میں 4 انٹر چینجز، 17 پل اور 26 سب ویز (ذیلی شاہراہیں) شامل ہیں۔

افتتاحی تقریب سے خطاب میں وزیراعظم نواز شریف نے کہا کہ خانیوال تا ملتان سیکشن کو کراچی-لاہور موٹروے (M-9) سے ملایا جائے گا جبکہ لاہور سے خانیوال موٹروے کا سنگ بنیاد اگلے ماہ رکھا جائے گا۔

افتتاحی تقریب میں وزیر اعلیٰ پنجاب شہباز شریف، گورنر پنجاب رفیق رجوانہ، وفاقی وزیر سکندر حیات اور مسلم لیگ کے دیگر رہنما بھی موجود تھے۔

نواز شریف نے مزید کہا کہ ترقیاتی منصوبوں میں اربوں روپے کی بچت کر رہے ہیں اور موٹر وے کی شفافیت پر کسی نے سوال نہیں اٹھایا۔

وزیر اعظم نے یہ بھی کہا کہ ماضی میں موٹروے کی مخالفت کرنے والے آج موٹرویز کے سب سےبڑے حامی ہیں۔

ان کا یہ بھی کہنا تھا کہ انھوں نے 1992 میں ملک میں موٹرویز کا وژن دیا اور شاہراہوں سے ملک کے کاشتکاروں کو فائدہ ہوگا.

وزیر اعظم نواز شریف نے کہا ہے کہ ماضی میں مخالفین نے سازشوں سے ترقی کا راستہ روکا لیکن اب قوم باشعور ہوچکی ہے اور ترقی کاراستہ روکنے والوں سے حساب لے رہی ہے۔

وزیر اعظم نے کہا آمریت اور ماضی کے غلط فیصلوں نے ملک کو موجودہ صورتحال تک پہنچایا لیکن موجودہ حکومت نے دہشت گردی کے خلاف جرات مندانہ فیصلے کرکے ملک امن قائم کردیا ہے۔

اس موقع پر انہوں نے گوادر کو پاکستان کا مستقبل قرار دیتے ہوئے ملک سے اندھیرے کو جلد ختم کرنے کے عزم کو بھی دہرایا۔

یہ بھی پڑھیں : کراچی-لاہور موٹر وے کا سنگ بنیاد

یاد رہے کہ 8 ماہ قبل مارچ میں وزیر اعظم نواز شریف نے کراچی تا لاہور موٹر والے کا افتتاح کیا تھا۔