دبئی: متحدہ عرب امارات (یو اے ای) کی ریاست شارجہ میں گاڑیوں کی خصوصی نمبر پلیٹوں کے نیلامی کے دوران ایک مقامی کاروباری شخص نے دنیا کی مہنگی ترین نمبر پلیٹ 50 لاکھ ڈالر میں خریدلی۔

العربیہ ڈاٹ نیٹ کی رپورٹ کے مطابق نمبر ’1‘ کی یہ نمبر پلیٹ، عارف احمد الزرعونی نامی مقامی کاروباری شخص نے خریدی۔

خصوصی نمبر پلیٹوں کی نیلامی کے موقع پر 60 نمبر نمائش کے لیے پیش کیے گئے تھے، جو مجموعی طور پر ایک کروڑ 30 لاکھ ڈالر سے زائد میں فروخت ہوئے، جبکہ نیلامی میں ایک ہزار 300 امرا نے حصہ لیا۔

نیلامی کے لیے پیش کیے گئے نمبروں میں 50، 333 اور 1000 کے ہندسے بھی شامل تھے۔

نیلامی کے دوران عارف احمد الزرعونی نے ’1‘ نمبر والی پلیٹ میں دلچسپی ظاہر کی، نیلامی کے دوران اس نمبر کی بولی 49 لاکھ ڈالر تک جاپہنچی، جس کے بعد الزرعونی نے آخری بولی لگاتے ہوئے یہ نمبر 50 لاکھ ڈالر میں حاصل کرلیا۔

نیلامی کے بعد ان کا کہنا تھا کہ وہ ہمیشہ ہی خود کو نمبر ون دیکھنا چاہتے ہیں، جس کے باعث ان کی خواہش تھی کہ ان کی گاڑی کی نمبر پلیٹ بھی ’1‘ ہو، جبکہ وہ اس نمبر کے حصول کے لیے کوئی بھی قیمت ادا کرنے کے لیے تیار تھے۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔